Pubblico due poesie in vernacolo oritano che a dire della signora Anita Moccia sarebbero state scritte alcuni decenni addietro dalla defunta madre Pietrina Dragonetti (*1919, +1979).
 |
| Pietrina Dragonetti |
Gghiustu all'annu.
Bambinieddu all'annu gghiustu
mi prisentu nnanzi a tia.
Fiaccu cranu e filu mushtu,
no amu cuetu mancu n'aulia.
Ca cce foi bambinu mia
cu ti muestri tant'amaru,
c'allu munnu non c'è briu
quannu manca lu dinaru.
L'annu passatu ti priai
e ti tissi tanta fiati:
"Fa' cu cessunu sti uai",
Ma sirai ca foi chiù pesciu
ca lu chiantu è ginirali.
Addò sciamu quisti misi
ci no aimu nudd'antrata,
ci no addò tei ca si lu tata?
Assignuria si lu tata nueshtru
e lu sai cuddu c'à ffari,
si patrunu ti la terra, ti lu cielu e ti lu mari!
T'agghiu nnuttu pi shti giurni,
cu ti faci nna mangiata,
to pilusi, to ricotti, to casieddi e nna sciuncata.
Mangia e mbivi ca è fattu gelu
e lu tiempu shtai a nei.
Quannu poi nchiani ancielu
no ti scurdari ti mei.
Tammi bonasorti e fammi santu
e turnisi cu li pisu,
quannu poi toppu muertu
mi nni puerti a mparatisu.
La prutesta ti lu bambinu.
No m'essi mai dicisu cu vegnu a shta terra,
ogn'annu a Natali pi mei eti na uerra!
Tuttu pi loru conzunu lu prisepiu:
A ci mi metti sobbr'a nna muntagna,
a ci intr'all'erva ti la campagna,
ci intr'a nna cascitedda ti cicori,
a ci mi nfassa comu nnu pupu,
ci inveci mi gghiushta ddà fori
e mi lass'allu friddu tuttu nutu!
La Matonna, puredda, ti tomila anni shtai nginucchiata;
l'anca ti San Giuseppi, ci no era pi lu bashtoni, ti mò ca s'era sciancata!
Sulu pi loru si priparunu lu pranzu: pettuli e baccalai,
purcidduzzi cu lu meli, turtillini cu lu brodu!
Pinzannu a mei si enchiunu la panza,
mentri iu uardu quedda sustanza!
Tutti ti mei grazzi vannu circannu:
"Fammi spusari la figghia mia";
"Fammi pigghiari na pinzioni spiciali";
"Fammi venciri alla lotteria";
"Fani assiri sierma ti lu spitali"!
No so cuntienti mai ti nienti:
volunu la casa nuova, tre televisioni,
la machina ti corsa e la pilliccia ti visoni!
Poi, pi tuttu l'annu no mi penzunu cchiui.
Ticitimi, allu tata mia ce li pozzi tiri ti vui?
