di Federico Caponegro
Ricordu Pasca ti l'anni passati
quannu lu sabbutu sunava menzatia,
nu suenu rrivava a tutti li cuntrati
puru lu chiù luntanu la sintia.
Vagnuni e granni lassaunu ti fatiari
tutti faciunu lu segnu ti la croci
gloria a Cristu si sintia critari
a ci chiù bella la tinia la voci.
Appena spicciaunu ti pricari
tutti purtaunu la puddica
tutti ansiemi si mintiunu a mangiari
e rispittaunu la tradizioni antica.
L'artieri ca no sciunu fori
la chiesa l'anchiunu nfigna alli purtuni
quannu risuscitava lu Signori
sunaunu li trenuli li cranni e li vagnuni.
Quannu assia Cristu cu la bandiera
si sintia nu veru tirramotu
tutti nginucchiati a fa prichiera
a ci vulia na grazia a ci facia nu votu.
Tutti li chiesi si anchiunu ti cristiani
cu li trenuli faciunu rumori
e tanta tiempu sunaunu li campani
pi fari gloria a lu Signori.
Prima era ti giurnu mo eti ti notti
lu stessu era lu significatu
no vannu vecchi ma vannu giuvinotti
cu vetunu Cristu risuscitatu.
Ogni annu Cristu mori pi tre ggiurni
cu vveti cuddu ca facimu nui,
ti ogni beni enchiunu li furni
e a Gesù Cristu no si penza chiui.
Li mammi antichi tutti nfacinnati
tuttu lu giurnu faciunu mustazzueli
e li puddichi cu l'ovi lissati
e piscuetti fatti cu lu meli
a cuiddi tiempi li chiutiunu a chiai
ieri spittari Cristu cu risuscitava
lu tiempu era luengu e no passava mai
ci no risuscitava no si mangiava.
Mo ca quiddi tiempi onnu passati
ognunu mangia quannu voli
li vennerdia no vennu rispettati
e si ponnu mangiari puru li brascioli.
